Ísfisktogarinn Vestmannaey VE landaði í Eyjum í gærmorgun að loknum fyrsta túr eftir Þjóðhátíð. Túrinn var innan við þrjá sólarhringa og það var einungis verið að veiðum í rúman sólarhring.

Egill Guðni Guðnason skipstjóri var ánægður. „Þetta voru um 45 tonn af ýsu sem fengust austur á Höfða. Það fiskaðist vel yfir nóttina en það var hins vegar lítið að hafa þegar bjart var orðið. Við hér um borð erum afskaplega sáttir við þetta og getum ekki verið annað,” sagði Egill Guðni.

Vestmannaey hélt til veiða á ný um hádegi í gær, að því er segir í frétt á vef Síldarvinnlunnar.