Huginn Helgason, knattspyrnuþjálfari og hreinsitæknir náði draumahöggi allra kylfinga í gær þegar hann fór holu í höggi. Draumahögginu náði hann á 12. braut á golfvellinum í Vestmannaeyjum en til verksins brúkaði hann 7-járn. 12. brautin er par þrjú braut og 142 metra löng frá gula teignum, þar sem Huginn og félagi hans, Ragnar Hilmarsson slógu upphafshöggið. „Ég vissi strax að þetta var gott högg. Boltinn fór í háaum boga að flötinni, skoppaði einu sinni hægra megin við flaggið og svo ofan í. Þetta er ekki svo flókin íþrótt, það þarf bara að koma boltanum ofan í,“ sagði Huginn brosandi í samtali við Eyjafréttir.