Fyrstu sýni úr kjarnaboruninni í Vestmannaeyjum komu upp úr holunni eftir hádegi á mánudaginn síðastliðinn.

Í upphafi var holan fóðruð niður á um 15 metra dýpi og er fyrsta borsýnið því tekið þaðan. Með þessu er hafinn sá hluti rannsóknarinnar sem felst í að greina eiginleika jarðlaganna með beinum sýnatökum, segir í frétt á vefnum Eyjagöng.is.

Þar segir jafnframt að í framhaldinu yrði farið í lektarprófanir. Eftirlit með framkvæmdinni er í höndum Benedikts Óskars Steingrímssonar fyrir hönd Völubergs, en allar aðgerðir á verkstað fara í gegnum hann. Fyrirtækin Völuberg og Efla sjá sameiginlega um stjórn og ráðgjöf við rannsóknina fyrir hönd Eyjaganga.

Ræktunarsamband Flóa og Skeiða annast framkvæmd borunarinnar og leggur til bæði búnað og sérhæft starfsfólk. Á meðfylgjandi mynd sést hinn þaulreyndi borstjóri, Magnús Gíslason, halda á fyrsta borsýninu.