Akureyri komst loks til Eyja til að leika margfrestaðan leik gegn ÍBV í Olís-deild karla nú í kvöld.

Eyjamenn voru lengi í gang og stóðu leikar 13-14 Akureyri í vil í hálfleik. Í síðari hálfleik fundu strákarnir þó þjölina sína og voru komnir með þriggja marka forskot þegar fimm mínútur voru liðnar af hálfleiknum. Þá forystu náðu Akureyringar aldrei að vinna upp og endaði leikurinn með fjögurra marka sigri ÍBV 31-27.

Með sigrinum styrkja Eyjamenn stöðu sína um miðbik deildarinnar með 17 stig og geta farið að horfa upp fyrir sig. En þar sitja m.a. næstu mótherjar ÍBV, Valur og FH.

Hákon Daði Styrmisson var markahæstur í liði Eyjamanna með 12 mörk. Aðrir markaskorarar voru Kristján Örn Kristjánsson – 5, Kári Kristján Kristjánsson – 4, Magnús Stefánsson – 3, Fannar Þór Friðgeirsson – 3, Gabríel Martinez – 2,
Dagur Arnarsson – 1 og Arnór Viðarsson – 1. Björn Viðar Björnsson varði 13 skot að marki Eyjamanna.