Enn bætist á sjúkralista karlaliðs ÍBV í knattspyrnu því nú er ljóst að miðjumaðurinn sterki Gunnar Már Guðmundsson þarf að fara í aðgerð vegna meiðsla í hné. Eftir aðgerð er áætlað að hann verði frá í 4-6 vikur en fyrir eru á sjúkralistanum þeir Tryggvi Guðmundsson og Andri Ólafsson. Það munar um minna fyrir lið ÍBV en Íslandsmótið hefst 5. maí næstkomandi þegar ÍBV sækir Selfoss heim. Hnéskel Gunnars brotnaði fyrr í vetur en greri vitlaust saman og því þarf hann að fara í aðgerð. Ef brotið hefði gróið rétt, hefði hann verið tilbúinn í fyrsta leik.