Hallar verulega á Vestmannaeyjar í samgönguáætlun
Hofnin TMS 20220630 084235 La 25
Vestmannaeyjahöfn. Eyjafréttir/Eyjar.net: TMS

Bæjarstjóri og hafnarstjóri Vestmannaeyja fóru nýverið yfir tillögu til þingsályktunar um samgönguáætlun fyrir árin 2026–2040 og fimm ára aðgerðaáætlun 2026–2030 í bæjarráði og framkvæmda- og hafnarráði. Í þeirri yfirferð kom fram að áætlunin halli verulega á Vestmannaeyjar þegar kemur að uppbyggingu samgönguinnviða.

Greint er frá þessu á vef Vestmannaeyjabæjar, þar sem farið er ítarlega yfir helstu áhyggjuefni bæjaryfirvalda vegna tillagnanna.

Helstu áhyggjuefni

  • Skerðing á framlögum til reksturs ferja, úr 1,7 milljörðum króna í 1,4 milljarða króna, sem gæti haft áhrif á þjónustu Herjólfs. Vestmannaeyingar segjast ekki munu sætta sig við slíka skerðingu.

  • Dýpkun í Landeyjahöfn: Í samgönguáætlun er gert ráð fyrir 600 milljónum króna, en í fjárlögum eru einungis 350 milljónir. Þörfin er talin nær einum milljarði króna til að uppfylla þær kröfur sem bæjarráð telur að þurfi að liggja til grundvallar útboði.

  • Ný ekjubrú fyrir Herjólf: Framkvæmdin er frestað til ársins 2029, þrátt fyrir að Vegagerðin telji hana forgangsverkefni. Slík frestun er talin óviðunandi.

  • Framkvæmdir á Básaskersbryggju frestast einnig til 2029, en áttu að hefjast haustið 2026. Þar sem um öryggismál er að ræða eru þær tafir ekki taldar ásættanlegar.

  • Hlutfall ríkisstyrkja til hafnarframkvæmda lækkar úr 60% í 40% frá árinu 2028, sem mun hafa veruleg áhrif á fjármögnun framkvæmda og möguleg kaup á nýjum dráttarbát.

  • Nýr dráttarbátur er ekki inni í drögum að áætlun, þrátt fyrir að núverandi bátur sé frá árinu 1998 og eigi erfitt með að sinna stærri skipum.

Í umfjölluninni kemur fram mikil óánægja með að uppbygging samgönguinnviða og hafnarframkvæmda sé ekki í samræmi við þau loforð sem gefin hafa verið, meðal annars um að hækkun veiðigjalda yrði nýtt til að styrkja innviði á þeim svæðum þar sem gjaldtakan bitnar hvað mest. Ef áformin ganga eftir er ljóst að Vestmannaeyjahöfn mun fá minni styrki en margar aðrar hafnir landsins, líkt og þróunin hefur verið undanfarin ár.

Vestmannaeyjabær hyggst senda ítarlega umsögn þegar samgönguáætlunin kemur til þinglegrar meðferðar og jafnframt óska eftir fundi með þingmönnum Suðurkjördæmis til að fara yfir málið.

Nýjustu fréttir

Menning
Brot af því besta úr viðtölum Stjána á Emmunni
Íþróttir
Dagur hlaut háttvísisverðlaun HDSÍ
Fréttir
Krakkarnir á Víkinni fögnuðu útskrift
Áhugavert
Sjómennska, Surtsey og sveitarstjórn í nýjum Eyjafréttum
Fréttir
Vorsýning fimleikafélagsins í dag
Íþróttir
Sandra besti sóknarmaður Olís deildar kvenna
Fréttir
Lífríki íslenskra hafna í hættu?
Íþróttir
Fimleikafélagið Rán tók þátt í Vormóti Gróttu
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.