Baldur tók við siglingum milli lands og Eyja í morgun, mánudaginn 20. júlí, á meðan viðgerður rafmótor er settur aftur í Herjólf IV.

Herjólfur hélt til Þorlákshafnar eftir síðustu ferð sína í gærkvöldi þar sem mótorinn verður settur í ferjuna. Samkvæmt upplýsingum frá Herjólfi ohf. er áætlað að verkið taki allt að fjóra sólarhringa.

Á meðan sinnir Baldur átta ferðum á dag milli Vestmannaeyja og Landeyjahafnar.

Brottfarir frá Vestmannaeyjum:
Kl. 07:00, 09:00, 11:00, 13:00, 16:00, 18:00, 20:00 og 22:00.

Brottfarir frá Landeyjahöfn:
Kl. 08:00, 10:00, 12:00, 14:00, 17:00, 19:00, 21:00 og 23:00.

Stefnt er að því að Herjólfur komi aftur í áætlun eins fljótt og verða má að uppsetningu lokinni. Herjólfur mun þá taka við átta ferða áætlun og sinna henni til og með 23. ágúst.