Forvarnahópur ÍBV-íþróttafélags var stofnaður í júní á síðasta ári en eins og nafnið gefur til kynna, hefur hópurinn það að markmiði að starfa að ýmsum forvörnum. Fyrsta verk­efni hópsins var að standa fyrir átakinu „Bleiki fíll­inn“ fyrir síðustu þjóðhátíð en verkefnið tókst afar vel, vakti athygli á landsvísu og bæjar­búar tóku því fagnandi. Nú ætlar Forvarnahópurinn, í samvinnu við Íslandsbanka og Íþróttaakademíu ÍBV-íþróttafélags, að fara af stað með aðra herferð sem beinir sjónum sínum að vímuefna­neyslu unglinga.