Töluverður vatnsleki hefur komið upp á hafnarsvæðinu í Vestmannaeyjum. Starfsmenn Vestmannaeyjahafnar hafa lokað fyrir lögnina sem um ræðir og vinna að því að staðsetja lekann.

Þetta kemur fram í svari Sigrúnar Ingu Ævarsdóttur, samskipta- og markaðsstjóra HS Veitna, við fyrirspurn Eyjafrétta. Samkvæmt rennslismælum varð töluverður leki á hafnarsvæðinu, en lögnin er í umsjón Vestmannaeyjahafnar.

Sigrún Inga segir lekann ekki hafa áhrif á vatnsbúskap eða þrýsting í vatnsveitunni þar sem lokað hafi verið fyrir viðkomandi lögn. Hún áréttar jafnframt að um sé að ræða bilun hjá einstökum viðskiptavini en ekki í kerfi HS Veitna. Lögnin og viðgerðin eru í umsjón Vestmannaeyjahafnar. HS Veitur fylgjast áfram með stöðu vatnsveitunnar.

Eyjafréttir sendu Dóru Björk Gunnarsdóttur hafnarstjóra fyrirspurn um umfang lekans, staðsetningu hans og viðgerð. Svar hafði ekki borist þegar fréttin var birt. Fréttin verður uppfærð þegar frekari upplýsingar liggja fyrir.