Fyrir þingkosningarnar sendu Eyjafréttir út fyrirspurn til allra framboða um hvort viðkomandi flokkur hyggist beita sér fyrir því að tryggja fjármuni til rannsókna á jarðlögum vegna Vestmannaeyjaganga. Nú þegar búið er að mynda nýja ríkisstjórn er ekki úr vegi að skoða nánar hvað ríkisstjórnarflokkarnir sögðu um málið.

Já, já og já

Víðir Reynisson, oddviti Samfylkingarinnar sagði: „Fyrirspurn um hvort við munum styðja við fjármögnun rannsóknar vegna jarðganga er mjög fljót svarað…já!“

Guðbrandur Einarsson oddviti Viðreisnar svaraði eftirfarandi: „Ég mun að sjálfsögðu styðja það að þetta verkefni fái framgang. Það er nauðsynlegt að fá vitneskju um hvort gögn séu fýsilegur kostur eða ekki. Fyrsta mál er að tryggja þessar 60 milljónir og það getur ráðherra málaflokksins gert. Öðru þarf að ná í gegn í fjárlögum til þess að tryggja framgang málsins til lengri tíma.“

Í svari Flokks fólksins sagði Ásthildur Lóa Þórsdóttir (oddviti flokksins í Suðurkjördæmi og nú ráðherra) að flokkurinn sé fylgjandi því að tryggja fjármagn fyrir þessa rannsókn.

Fæddur í Eyjum

Flokkur fólksins fer einmitt með samgöngumálin í nýrri ríkisstjórn og er Eyjólfur Ármannsson samgöngu- og sveitarstjórnarráðherra. Eyjólfur er fæddur í Vestmannaeyjum 23. júlí 1969. Hann hefur verið alþingismaður Norðvesturkjördæmis fyrir Flokk fólksins frá árinu 2021. Hann hefur m.a. setið í allsherjar- og menntamálanefnd og fjárlaganefnd. Eyjólfur lauk embættisprófi í lögfræði HÍ 1998, stundaði nám í Evrópurétti við Kaþólska háskólann í Leuven í Belgíu og lauk LLM-prófi í lögfræði frá Pennsylvaníuháskóla í Fíladelfíu í Bandaríkjunum.

Setja kraft í samgönguframkvæmdir um land allt, þ.á m. jarðgangagerð

„Það er tilhlökkunarefni að hefjast handa við fjölmörg mikilvæg verkefni í ráðuneytinu og kynnast starfsfólki hér. Ég færi fráfarandi ráðherra og forvera hans þakkir fyrir störf þeirra í ráðuneytinu. Meðal forgangsverkefna verður að setja kraft í samgönguframkvæmdir um land allt, þ.á m. jarðgangagerð og Sundabraut, efla almenningssamgöngur og styðja við fjölbreytta ferðamáta. Við hlökkum til að eiga áfram öflug og góð samskipti við sveitarfélög og efla byggðir landsins. Loks legg ég áherslu á að vinna áfram af alúð að málefnum Grindvíkinga,“ sagði Eyjólfur Ármannsson er hann tók við sem ráðherra á dögunum.

Nú er hvíslað um það í Eyjum að Eyjólfur hljóti að tryggja það að farið verði í þessa mikilvægu rannsókn, ekki síst í ljósi þess að allir flokkar sem náðu kjöri á þing voru mjög jákvæðir fyrir að framkvæma rannsóknirnar. Það ætti því að vera þverpólitísk sátt um að einhenda sér í þetta mikilvæga mál.