Kvennalið ÍBV í handbolta mætir Haukum í dag í fjórða leik liðanna í úrslitakeppninni. Leikið verður í Kuehne+Nagel höllinni og hefst leikurinn klukkan 15:00.

ÍBV er í lykilstöðu í einvíginu eftir dramatískan sigur í síðasta leik, þar sem Eyjakonur höfðu betur 38–37 eftir tvíframlengdan leik. Með sigrinum náði liðið 2–1 forystu í einvíginu og getur með sigri í dag tryggt sér sæti í úrslitaeinvíginu.

Leikurinn í Eyjum var æsispennandi frá upphafi til enda. ÍBV var yfir stærstan hluta leiksins en Haukar jöfnuðu og komust yfir á lokasekúndum venjulegs leiktíma. Kristrún Ósk Hlynsdóttir jafnaði hins vegar á síðustu sekúndum og tryggði framlengingu þar sem Eyjakonur reyndust sterkari í lokin.

Sandra Erlingsdóttir fór á kostum í síðasta leik með 14 mörk og Birna Berg Haraldsdóttir bætti við níu mörkum í mikilvægum sigri ÍBV. Nú er ljóst að mikið er undir í dag – annað hvort tryggir ÍBV sér sæti í úrslitum eða Haukar jafna einvígið og knýja fram oddaleik.