ÍBV og Haukar mætast í kvöld í þriðja leik liðanna í undanúrslitum Olís-deildar kvenna í handbolta. Staðan í einvíginu er jöfn, 1–1, og því ljóst að mikið er undir þegar flautað verður til leiks í Íþróttamiðstöðinni klukkan 18:30.

Eyjakonur fara inn í leikinn fullar sjálfstrausts eftir sterkan sigur í síðasta leik liðanna, þar sem þær sýndu mikinn karakter og komu til baka eftir að hafa verið undir. Leikurinn endaði með eins marks sigri ÍBV, 28–29, eftir æsispennandi lokamínútur.

Sá sigur jafnaði einvígið og tryggði að allt er opið fyrir kvöldið, þar sem sigurvegari kemst skrefi nær sæti í úrslitum um Íslandsmeistaratitilinn.

Kalla eftir öflugum stuðningi

Í tilkynningu frá handknattleiksdeild ÍBV er stuðningsfólk hvatt til að mæta og skapa öfluga stemningu: Baráttan heldur áfram og spennan eykst með hverjum leik. Staðan er 1–1 og stefnan er sett á heimasigur.

Upphitun hefst klukkan 17:30, klukkutíma fyrir leik.