ÍBV og Stjarnan mættust í 15. umferð Bestu deildar kvenna á Hásteinsvelli í kvöld. Leiknum lauk með 3-2 sigri ÍBV. Með sigrinum komust Eyjakonur upp fyrir Stjörnuna og eru nú í þriðja sæti deildarinnar með 24 stig. Stjarnan er í sæti fyrir neðan með 23 stig.

Leikurinn var jafn fyrstu mínúturnar en Eyjakonur tóku yfir leikinn nokkuð fljótt. Þær náðu forystunni eftir tæpar fimmtán mínútur þegar Allison Grace Lowrey skoraði eftir sendingu Eddu Daggar Sindradóttur. Aðeins mínútu síðar tvöfaldaði Ágústa María Valtýsdóttir forystu ÍBV. Boltinn barst þá til hennar inn á teig stjörnunnar og setti hún boltann í fjærhornið. Stjarnan minnkaði muninn á 22. mínútu leiksins þegar Murielle Tiernan skoraði af stuttu færi eftir sendingu frá Huldu Hrund Arnarsdóttur. Staðan 2-1 í hálfleik.

Spennandi lokamínútur

ÍBV byrjaði síðari hálfleikinn af krafti og juku forskot sitt á upphafsmínútunum. Allison Grace Lowrey skoraði þriðja mark ÍBV og sitt annað í leiknum á 52. mínútu. ÍBV fékk þá hornspyrnu sem Ágústa María Valtýsdóttir tók og eftir mikinn darraðadans inn á teignum datt boltinn fyrir Allison Lowrey sem kom boltanum í netið. 

Eyjakonur voru nánast með öll völd á vellinum en síðustu 20 mínúturnar sóttu Stjörnukonur í sig veðrið. Þær minnkuðu muninn í 3-2 á 77. mínútu með marki frá Fanney Lísu Jóhannesdóttur. Stjarnan fékk dauðafæri á lokamínútum leiksins til að jafna leikinn en Jakobína Hjörvarsdóttir fékk frían skalla inn á markteig en náði ekki að stýra honum á markið. Lokatölur leiksins 3-2 og frábær heimasigur ÍBV í höfn. 

15. umferð Bestu deildar kvenna

• Þróttur R. 3 – 2 Valur
• Breiðablik 1 – 0 Grindavík/Njarðvík
• Fram 4 – 6 FH
• ÍBV 3 – 2 Stjarnan
• Víkingur R 0 – 3 Þór/KA