„Það er sagt að þú sért einn eftirsóttasti bitinn í pólitíkinni þessa dagana og að flokkarnir keppist við að bjóða þér sæti á lista. Ertu á leið í landsmálin?“ spurði stjórnandi Silfurs á RÚV Írisi Róbertsdóttur, bæjarstjóra í Vestmannaeyjum í þætti kvöldsins. Þar var Íris einn af fjórum gestum sem fóru yfir stöðuna í pólitíkinni í dag.

Spurningin kemur ekki á óvart því heyrst hefur að Írisi standi til boða sæti á lista Samfylkingarinnar í Suðurkjördæmi. Hún var nokkuð afdráttarlaus í svari sínu án þess þó að slá neitt út af borðinu. „Ég er mjög ánægð í því starfi sem ég er í dag,“ sagði Íris. „Ég get sagt þér, að hluti af því er að vera í sambandi við ráðherra og formenn þingflokka. Ég er það og í ágætu samstarfi ásamt öðru sem snýr að hagsmunamálum fyrir Vestmannaeyjar,“ sagði Íris en þá greip stjórnandinn inn í og spurði hvort Viðreisn og Samfylking hefðu boðið henni sæti? Þessu svaraði Íris ekki með öðru en blikka stjórnandann og uppskar mikinn hlátur.