Kristín Klara Óskarsdóttir, leikmaður ÍBV í fótbolta, lék með u-19 ára landsliði Íslands í Sundsvall í Svíþjóð á dögunum. Liðið lék tvo leiki, gegn Noregi og Svíþjóð, en leikir liðsins fóru fram á laugardag og mánudag.

Á Facebook-síðu ÍBV segir, ,,Kristín var í leikmannahópnum ásamt mörgum leikmönnum úr Bestu deildinni en hún var í byrjunarliðinu gegn Norðmönnum á laugardaginn þegar íslenska liðið vann 3-2 sigur. Kristín lék þar 60 mínútur í hægri bakverðinum og þótti standa sig mjög vel. Kristín kom inn í hálfleik í seinni leik liðsins gegn heimakonum frá Svíþjóð en þar reyndust sænsku stelpurnar sterkari og unnu 1-0 sigur. Þá lék hún aftur í hægri bakverðinum og gerði það vel.”

U-19 landsliðið mun leika í lokakeppni Evrópumótsins í sumar en þær unnu sinn riðil í undankeppninni í vor. Í riðli með Íslandi voru Finnland, Serbía og Danmörk. 

Evrópumótið fer fram dagana 27. júní – 10. júlí og leikið er í Bosníu og Hersegóvínu. Ísland verður í riðli með Austurríki, Spáni og Sviss. Átta sterkustu þjóðir álfunnar í þessum aldursflokki leika á lokamótinu og fara tvö efstu lið hvors riðils áfram í undanúrslit.