„Þetta var frábær dagur í Eyjum. Við áttum mjög gagnlega vinnufundi á sjúkrahúsinu og í Hraunbúðum og við Íris bæjarstjóri tókum fundinn okkar bara úti í góða veðrinu. Samtalið um heilbrigðismálin á Vigtinni bakhúsi var gott og nú þurfum við jafnaðarmenn að standa undir væntingum.

Við ætlum að kynna útspil í heilbrigðismálum næsta haust sem byggir meðal annars á þessari vinnu. Þar á eftir tökum við fyrir atvinnu og samgöngur og þá komum við aftur til Eyja. Ég vil bara þakka fyrir mig í bili og óska Eyjamönnum til hamingju með Íslandsmeistaratitilinn í handbolta!“ sagði Kristrún Frostdóttir, formaður Samfylkingarinnar eftir fundinn í Vigtinni á miðvikudaginn.

Fundurinn var ágætlega sóttur en þar bauð Kristrún upp á samræður um heilbrigðismál í Vestmannaeyjum og finnst sennilega flestum í Eyjum að af nógu sé að taka.

„Þegar sjúkraflugið var allt flutt á Akureyri var sagt að það væri allt í lagi vegna þess að það væri skurðstofa í Vestmannaeyjum. En svo var henni lokað nokkrum árum síðar. Við búum við mikið óöryggi hér að hafa ekki sama aðgengi að heilbrigðisþjónustu. Sem er samt bundið í lög að eigi að vera jöfn,“ sagði einn fundargesta.

Annar tók í svipaðan streng: „Það sem snýr að bara venjulegu fólki hérna á vinnumarkaði er ekki síst kostnaðurinn sem við berum umfram þá sem eru til dæmis í Reykjavík eða á Akureyri, sem þurfa bara að hlaupa yfir götuna eftir sinni heilbrigðisþjónustu. Við erum að borga sömu skatta og allt það. En við erum ekki að fá sömu þjónustu.“

Mynd af fundinum.