Undanfarna daga hafa undarleg tæki sést að störfum í Dverghamrinum þegar tvær götufræsivélar hófu að fræsa raufar í malbikið fyrir ljósleiðaralögn. Hér eru á ferð starfsmenn Línuborunar sem eru að byrja að leggja blástursrör fyrir nýtt fyrirtæki í eigu Vestmannaeyjabæjar, Eygló ehf.

Eygló ehf. mun halda utan um lagningu ljósleiðara í þéttbýli Vestmannaeyjabæjar. Félagið er alfarið í eigu Vestmannaeyjabæjar og markmiðið með stofnun þess er að tryggja íbúum Vestmannaeyja jafn gott aðgengi að Internetinu og íbúar annarra sveitarfélaga njóta.

Umferð meðan á framkvæmdum stendur

Starfsmenn Línuborunar notast við götufræsara sem fræsir 10-15cm rauf í götur og jarðveg og leggja síðan blástursrör þar ofan í. Með þessari aðferð er hægt að leggja ljósleiðara án þess að loka götum. Bílar geta auðveldlega keyrt yfir raufina. Fólk á hjólum þarf hins vegar að gæta varúðar í kringum framkvæmdirnar þar sem framhjólin eiga það til að snúast þegar þau hitta á raufina og hjólreiðamaður gæti hæglega skollið fram fyrir sig. Þetta á við um öll hjól, þ.m.t. reiðhjól, hlaupahjól og vélhjól. Einnig er hætta á að rigning geti skolað jarvegi úr uppfylltum raufum og við það myndast brún sem getur verið óþægilegt að hjóla á. Línuborun mun leggja alla áherslu á að framkvæmdin muni hafa eins lítil áhrif og möguleiki er á. Raufum verður lokað svo fljótt sem auðið er svo allt jarðrask verði íbúum til minnstu trafala.

Tveir áfangar af sex teknir í sumar

Í sumar og haust er stefnt á að taka fyrstu tvo áfangana af sex. Fyrst verða blástursrör fræst ofan í jarðveginn og heimtaugar lagðar í öll hús. Strengirnir verða lagði frá húsum að tengistöðinni, sem í þessum áfanga er í Hamarsskóli. Þegar búið er að leggja blástursrörin verður hafist handa við að blása ljósleiðaranum inn í hús og tengja við dreifikerfið. Nú þegar er búið að leggja stofnlagnir frá Hamarsskóla. Þegar búið verður að blása ljósleiðaranum í öll hús í þessum áfanga geta gagnaveitur boðið þjónustu sína við bæjarbúa sem fengið hafa tengingu.

Þjónustuveitur í gegnum ljósleiðara

Eygló ehf. leggur áherslu á að allar gagnaveitur sem áhuga hafa, geti fengið aðgang að ljósleiðarakerfi fyrirtækisins. Þannig verði stuðlað að heilbrigðri samkeppni bæjarbúum í hag, ætti að tryggja betri þjónustu og betra verð. Eygló ehf. ætlar ekki að reka virðisaukandi þjónustu með ljósleiðarakerfi bæjarins, eins og t.d. Internetþjónustu. Það er ekki hlutverk fyrirtækisins. Eygló mun einungis selja ljós á milli notenda og gagnaveitna. Fyrir það greiða notendur svokallað línugjald. Með þessu ættu allar þjónustuveitur að geta boðið Vestmannaeyingum tengingar, hafi þjónustuveiturnar áhuga á því. Þegar lagningu ljósleiðarans líkur í hverjum áfanga fyrir sig mun Eygló senda tilkynningu til íbúa og gagnaveitna um að þjónustan sé opin og þjónustuveitur geta hafið markaðssetningu á svæðinu. Á þeim tímapunkti geta íbúar haft samband við sína þjónustuveitu og óskað eftir því að fá að kaupa internet yfir ljósleiðarann í stað ljósnet eða ADSL eins og er í dag. Einnig geta þjónustuveitur sent inn tilboð um þá þjónustu sem þeir hafa upp á að bjóða

Almenn sátt og skilningur íbúa meðan á framkvæmdum stendur

Almenn sátt virðist ríkja um verkefnið og framkvæmdirnar það sem af er. Íbúar á svæðum þar sem framkvæmdir eru hafnar taka verkefninu opnum örmum og þykir framtakið vera orðið löngu tímabært. Það er von allra sem koma að þessu verkefni að íbúar sýni framkvæmdaaðilum og raski þar af leiðandi skilning og að verkefnið allt muni vinnast í sátt og samlyndi við íbúa Vestmannaeyjabæjar. Hér fyrir neðan má sjá nokkrar myndir af framkvæmdum sem hófust fyrir nokkrum dögum síðan.

Af: vestmannaeyjar.is