Landtöku nýju almannavarnarlagnarinnar NSL-4 í Skansfjöru lauk rétt rúmlega klukkan sex í morgun. Aðgerðin gekk mjög vel og var að fullu í samræmi við fyrirliggjandi skipulag og hönnun. Þetta kemur fram í tilkynningu frá bæjaryfirvöldum.

Um klukkan hálffjögur í nótt var síðara endastykki lagnarinnar komið frá borði útlagningarskipsins Seven Navica. Skipið var þar með laust og sigldi frá Klettsvík. Lögninni var í kjölfarið fleytt yfir í Skansfjöru þar sem landtakan hófst.

Næstu skref eru að sanda yfir lögnina og loka skurðinum sem hún liggur í. Þá verður hún tengd svo hægt verði að hefja þrýstiprófun. Tjón varð á NSL-4 við útlagningu aðfaranótt sunnudagsins 9. ágúst. Ákveðið var að ljúka verkinu til að lágmarka frekara tjón allra aðila.

Nú er beðið eftir formlegri lokaskýrslu um atvikið. Forsvarsmenn Vestmannaeyjabæjar segjast ekki munu tjá sig frekar um tjónið eða veita nánari upplýsingar fyrr en sú skýrsla liggur fyrir.