Svo gæti farið að lundaveiði verði bönnuð næstu fimm árin um allt land. Starfshópur sem Svandís Svavarsdóttir, umhverfisráðherra skipaði í september um verndun og endurreisn svartfuglastofna leggur til að fimm tegundir sjófugla af svartfuglaætt verði friðaðar fyrir öllum veiðum og nýtingu næstu fimm árin en þetta eru álka, langvía, stuttnefja, lundi og teista. Málið var tekið fyrir á fundi ríkisstjórnar í morgun og var samþykkt að umhverfisráðherra undirbúi frumvarp til breytinga á lögum um vernd, friðun og veiðar á villtum fuglum og villtum spendýrum.