Aukin umferð hefur verið um starfssvæði Laxey við Viðlagafjöru undanfarin kvöld. Talið er að umferðin tengist pysjutímabilinu sem nú er gengið í garð í Vestmannaeyjum.

Í tilkynningu frá fyrirtækinu er minnt á að mikil uppbygging stendur yfir á svæðinu og því sé um framkvæmdasvæði að ræða sem ekki er opið almenningi. Af öryggisástæðum verður hliðinu inn á svæðið lokað að kvöld- og næturlagi.

Fólk er hvatt til að virða lokanir og þær öryggisreglur sem gilda á svæðinu. Jafnframt kemur fram að starfsfólk Laxey muni að sjálfsögðu koma þeim pysjum til bjargar sem kunna að villast inn á starfssvæðið.

Laxey óskar pysjuleitendum góðrar og öruggrar leitar, segir í lok tilkynningarinnar. Pysjutímabilið er nú komið vel af stað en samkvæmt upplýsingum á lundi.is hefur 91 pysja verið skráð það sem af er tímabilinu.