- Eyjafréttir
- ·
- Þjóðhátíð
- ·
Ritstjórn
Á miðvikudaginn kom út nýtt lag með Patrek „PBT“ Atlasyni söngvara. Í laginu kveður heldur betur við nýjan tón en lagið er opinbert Þjóðhátíðarlag, samið og sungið á kassagítar sem ekki hefur verið mest notaða hljóðfærið í hans lögum til þessa. Lagið samdi hann með Arnari Dór Arnarssyni, Anya Shaddock og Hákoni Guðna Hjartarsyni sem líka spilar á laginu og stjórnaði upptökum. Þjóðin var spennt fyrir laginu því það þaut beint inn á topp tuttugu á Spotify eftir einn dag í spilun.
Farið á 15 Þjóðhátíðir í röð
„Ég er búinn að fara á Þjóðhátíð í 15 ára röð og ég elska Þjóðhátíð. Ég hef farið á Wireless hátíðina og villtustu partíin á Ibiza en það kemst ekki nálægt Þjóðhátíð,“ sagði Patrik í viðtali í vikunni í tilefni af útkomu lagsins. „Þess vegna langaði mig að henda í lag með þrem, fjórum gripum og sannleikanum að vopni um þessa frábæru hátíð,“ segir hann.
Rangur maður í brekkunni
Lagið er ljúfsár lýsing á ungum manni í algleymi hátíðarinnar og einhverjir hafa nefnt að stemmningin í textanum sé ekki ósvipuð þeim í textanum að sumarslagaranum „Rangur maður” með Sólstrandargæjunum. Lagið er að hluta til byggt á sannsögulegum atburðum frá hátíðinni í fyrra þegar Patrik datt í það með Þjóðhátíðargestunum eftir að hann kom fram á hátíðinni.
Komið fram á Þjóðhátíð síðan 2023
„Ég hef verið að koma fram á Þjóðhátíð alveg frá því að „Skína” kom út árið 2023. Það hefur verið alveg geggjað og einn af hápunktum hvers árs hjá mér. Í fyrra eftir giggið ákvað ég svo bara að taka Þjóðhátíðarpakkann alla leið og skvetti bara í mig bjór og setti partýið allt í botn,” segir Patrik. Kannski væri það heldur ekki í frásögur færandi nema fyrir það að Patrik er yfirlýstur bindindismaður til nokkurra ára.
Kassagítar slagari og ólíkt því sem Patti hefur verið að gera
„Ég hló svolítið að mér og hef svolítið verið að leika mér með þetta concept síðan í fyrra og í vor var mér boðið að taka þátt í lagahöfundavinnustofu og þar small textinn. Að einhverju leyti er þetta byggt á þessu kvöldi svo er sett vel í þetta svo maður maxi upplifunina,” segir Patrik um textann. Lagið er svo keyrt áfram á kassagítar og er í raun allt annar tónn en það sem ég hef verið að gera,” bætir hann við.
