Félagið Kraftur, sem styður ungt fólk sem greinst hefur með krabbamein og aðstandendur þeirra, stendur fyrir perlun armbanda í Höllinni í Vestmannaeyjum laugardaginn nk. frá klukkan 13-16.

Viðburðurinn er hluti af árlegri fjáröflunar- og vitundarvakningu félagsins. Að þessu sinni verður perlað nýtt „Lífið er núna“ armband, sem margir þekkja sem tákn um styrk, von og samstöðu.

Markmið viðburðarins er að vekja athygli á starfi Krafts og safna fé til að styðja við bakið á ungu fólki sem hefur greinst með krabbamein, sem og fjölskyldum þeirra og aðstandendum. Allir eru velkomnir að taka þátt, perla armband og leggja málefninu lið.