Viðgerð á rafmótor Herjólfs IV er nú lokið og stefnir ferjan til Þorlákshafnar aðfaranótt mánudags þar sem mótorinn verður settur í skipið.

Samkvæmt tilkynningu frá Herjólfi ohf. er gert ráð fyrir að uppsetning mótorsins taki allt að fjóra sólarhringa. Á meðan verður Herjólfur úr áætlun en ferjan Baldur sinnir átta ferðum á dag milli Vestmannaeyja og Landeyjahafnar.

Þegar uppsetningu mótorsins er lokið mun Herjólfur taka aftur við siglingum eins fljótt og auðið er. Þá verður áfram siglt samkvæmt átta ferða áætlun til og með 23. ágúst.

Baldur snýr aftur til siglinga á Breiðafirði um leið og Herjólfur hefur hafið áætlunarsiglingar á ný.