Eyjakonan Ragna Sara Magnúsdóttir hefur framlengt samning sinn við knattspyrnudeild ÍBV um tvö ár, hún hefur verið lykilmaður hjá liðinu síðustu ár eða allt frá því að hún vann sér fast sæti í byrjunarliðinu árið 2019. Þetta kemur fram í tilkynningu á heimasíðu félagsins.

Ragna, sem er fædd árið 2003, er uppalin hjá ÍBV og lék með öllum yngri flokkum félagsins, fyrsta leik sinn í deildarkeppni með meistaraflokki spilaði hún árið 2018 þegar hún kom inn á sem varamaður gegn HK/Víkingi. Ragna hefur leikið landsleiki fyrir U17 ára og U19 ára landsliðin.

Samtals hefur Ragna leikið 90 KSÍ leiki fyrir ÍBV, þar af 61 í efstu deild. Ragna er nú við nám erlendis en mikið gleðiefni er fyrir ÍBV að hún velji að leika áfram með liðinu. Bræður Rögnu, Heiðmar Þór og Sigurður Arnar, léku með KFS og ÍBV á síðustu leiktíð en Sigurður er eins og Ragna í námi í Bandaríkjunum og hefur hann átt frábært tímabil með háskólaliði sínu Ohio State.