Eyjahljómsveitin hOFFMAN sendir í dag frá sér plötuna VIÐ, þriðju breiðskífu sveitarinnar. „Við erum einfaldlega drullustoltir af þessari skífu,“ segir Gunnar Geir Waage. Á plötunni eru átta lög og íslenskan er nú komin í aðalhlutverk.

hOFFMAN kom fyrst fram á sjónarsviðið árið 2003 og vakti athygli fyrir kraftmikið rokk og öfluga sviðsframkomu. Sveitin hætti árið 2011 en sneri aftur árið 2024 með Shame, fyrsta nýja laginu í 15 ár. Í kjölfarið fylgdu uppseldir tónleikar í Alþýðuhúsinu í Eyjum og ljóst varð að endurkoman var meira en stundarævintýri.

Nú er VIÐ komin út á vínyl, CD og streymisveitum. Ólafur Kristján Guðmundsson, söngvari sveitarinnar, semur textana og sækir þar meðal annars í eigin lífsreynslu. Nafn plötunnar segir líka sína sögu.

„Lífið er VIÐ – ekki ÉG,“ segir Gunnar Geir. „Látum VIÐ-væðinguna hefjast. Út um landið, inn á heimilin, í bílana, heyrnartólin, eyrnagöngin og hvert annað sem hún ratar.“

hOFFMAN skipa Ólafur Kristján Guðmundsson, söngur, Gunnar Geir Waage og Víkingur Másson, gítarar, Sæþór Ágústsson, bassi, og Karl Ágúst Guðmundsson, trommur.

„Til hamingju VIÐ,“ segir Gunnar Geir.

Rokkið lifir í Eyjum.

Meira í vefblaði Eyjafrétta á fimmtudaginn.