Nóttin var helst til tíðindalítil hjá lögreglunni í Vestmannaeyjum miðað við þann mannfjölda sem nú er í Eyjum. Karl Gauti Hjaltason, lögreglustjóri segir í samtali við Eyjafréttir/Eyjar.net að aðeins einn hafi gist fangageymslur og var það vegna ölvunar. Þá komu upp tvö minniháttar fíkniefnamál.
Hann segir að þrátt fyrir leiðinda veður þá hafi þetta gengið ótrúlega vel fyrir sig. Aðspurður um fjölda þjóðhátíðargesta segir Karl Gauti að það sé gríðarlega fjölmennt. ,,Þetta er ein af stærstu hátíðum hingað til.” Enn á svo eftir að bætast við því búist er við töluverðum fjölda til Eyja í dag, en í kvöld syngja þjóðhátíðargestir saman í brekkunni í Brekkusöngnum og í kjölfarið verða tendruð 150 blys í dalnum í tilefni af 150 ára afmæli hátíðarinnar.
Í kvöld klukkan 18.00 tekur svo gildi önnur gul veðurviðvörun vegna djúprar lægðar sem stefnir að landinu og á að valda leiðindaveðri um landið allt. Vill Karl Gauti beina því til þjóðhátíðargesta að það sé ekkert lát sé á hvassviðri og bleytu og biður hann gesti um að huga vel að tjöldum sínum fyrir kvöldið.
Uppfært: Í tilkynningu lögreglu segir að undir morgun hafi lögregla hafið leit að Helga Ingimar, tvítugum dreng, sjá færslu fyrr í morgun. Björgunarbáturinn Þór var ræstur út til leitar af sjó.
