Nýskipaður sendiherra Svíþjóðar á Íslandi, Jan Lundin, er genginn til liðs við Taflfélag Vestmannaeyja. Fyrir eru þrír Svíar í félaginu: stórmeistararnir Nils Grandelius og Slavko Cicak og FIDE-meistarinn Anders Larsson.

Jan er fæddur árið 1963 og var það Einvígi aldarinnar í Reykjavík árið 1972 sem kveikti skákáhuga hans. Þegar hann hóf nám í menntaskóla lagði hann meðal annars stund á rússnesku – einmitt til þess að verða betri skákmaður.

Jan er með háskólapróf í slavneskum tungumálum, Austur-Evrópufræðum og hagfræði frá Háskólanum í Uppsölum auk meistaraprófs í lögfræði frá Háskólanum í Stokkhólmi.

Hann á að baki áratugaferil í sænsku utanríkisþjónustunni. Meðal annars var hann sendiherra Svíþjóðar í Belgrad, gagnvart Serbíu og Svartfjallalandi, á árunum 2016 til 2021. Hann tók við embætti sendiherra Svíþjóðar á Íslandi í ágúst síðastliðnum.

Jan er með 2.190 elóstig en hefur hæst náð um 2.400 stigum. Helsta afrek hans á skáksviðinu er líklega stórmeistaraáfangi sem hann náði í Evrópukeppni félagsliða í Rogaška Slatina í Slóveníu árið 2011.

Ljóst er að Taflfélag Vestmannaeyja fær öflugan skákmann til liðs við sig, sem mun styrkja sveit félagsins í úrvalsdeildinni á komandi keppnistímabili. Í tilkynningu frá félaginu býður Taflfélag Vestmannaeyja Jan velkominn í félagið.