Skólaslit Grunnskóla Vestmannaeyja fóru fram á Stakkó í morgun við hátíðlega athöfn. Nemendur mættu fyrst í skólann klukkan 10:00 og gengu þaðan ásamt kennurum yfir á Stakkó þar sem skólaárinu var formlega slitið.

Dagskráin var fjölbreytt og skemmtileg. Skólalúðrasveit Vestmannaeyja lék fyrir gesti og nemendur í yngri bekkjum sýndu dansatriði sem þeir höfðu æft fyrir tilefnið.

Þrátt fyrir að rigning hafi látið á sér kræla var veðrið ágætt og stemningin góð. Börnin létu veðrið ekki aftra sér og nutu dagsins.

Með skólaslitunum lýkur enn einu skólaári og nú tekur sumarfríið við hjá nemendum.