Bæjarráð Vestmannaeyja hefur samþykkt tilboð upp á 480 milljónir króna í fasteignina að Ægisgötu 2, með fyrirvara um staðfestingu bæjarstjórnar.

Eignin, sem er á 2. og 3. hæð hússins, var sett í söluferli þann 16. febrúar síðastliðinn og óskað eftir tilboðum með fresti til 20. mars. Engin formleg tilboð bárust innan þess frests.

Á fundi bæjarráðs 25. mars var samþykkt að halda eigninni áfram í auglýsingu. Nú hefur hins vegar borist tilboð sem ráðið hefur farið yfir og samþykkt fyrir sitt leyti.

Bæjarstjóra hefur verið falið að undirrita samninginn, með fyrirvara um endanlega staðfestingu bæjarstjórnar.