Skemmdir urðu á nýju almannavarnarlögninni NSL-4 við útlagningu aðfaranótt sunnudagsins 9. ágúst. Vinna við lagningu hennar var stöðvuð í kjölfarið og er nú beðið eftir skýrslu um orsakir og umfang tjónsins.

Vestmannaeyjabær greindi frá þessu í tilkynningu í dag. Þar kemur fram að atvik hafi orðið hjá Subsea 7, sem annast útlagningu lagnarinnar, með þeim afleiðingum að hún skemmdist.

Strax í kjölfarið var ráðist í greiningar- og úttektarvinnu á vettvangi í samvinnu við hlutaðeigandi sérfræðinga. Sú vinna hefur staðið yfir undanfarna daga.

Nú er beðið eftir formlegri skýrslu frá Subsea 7 sem á að staðfesta nákvæmar orsakir tjónsins og hversu umfangsmiklar skemmdirnar eru.

Í tilkynningu Vestmannaeyjabæjar á sunnudag kom aðeins fram að tæknilegir örðugleikar hefðu tafið framkvæmdina og að útlagningaraðilinn ynni að því að yfirfara og meta stöðuna.

Ekki liggur fyrir á þessu stigi hvaða áhrif tjónið hefur á framhald framkvæmdarinnar eða hvenær útlagning getur hafist á ný. Vestmannaeyjabær segist munu veita frekari upplýsingar þegar niðurstöður skýrslunnar liggja fyrir.