Hið árlega húkkaraball fór fram í blíðskaparveðri í Vestmannaeyjum í gærkvöldi. Að sögn lögreglu var nóttin fremur róleg og góður bragur á skemmtanahaldinu. Tveir gistu þó fangageymslur vegna ölvunar.

Lögreglan verður sem fyrr með mikinn viðbúnað yfir Þjóðhátíð og mun leggja sérstaka áherslu á að koma í veg fyrir vopnaburð hátíðargesta. Tekið verður hart á brotum af því tagi.

Þá hvetur lögreglan hátíðargesti til að vera vakandi fyrir umhverfi sínu, stuðla að öryggi í samskiptum og virða mörk annarra. Fólk er jafnframt hvatt til að láta vita ef það verður vart við óæskilega hegðun.

„Þannig getum við stuðlað að góðri skemmtun án ofbeldis, átaka eða áreitni,“ segir í tilkynningu lögreglunnar í Vestmannaeyjum.