Það vakti athygli í leik Vals og ÍBV í gær að Magnús Gylfason, sem var leystur undan samningi hjá ÍBV degi fyrir leikinn, skyldi mæta á völlinn. Það vakti svo ekki síður athygli þegar hann fékk sér sæti meðal stuðningsmanna ÍBV og settist niður með þeim Heimi Hallgrímssyni, sem þjálfaði liðið á undan Magnúsi og Hermanni Hreiðarssyni, sem tekur við ÍBV liðinu eftir tímabilið. Ekki bar á öðru en að þeir skemmtu sér konunglega eins og sjá má á myndbandi Stöðvar 2 Sport frá leiknum í gær.