Björgun ehf. vinnur nú að dýpkun Landeyjahafnar svo Herjólfur megi sigla. Dýpka þarf eina 20-25.000 m3 í hafnarmynninu í innsiglingunni. Ekki er þörf á að dýpka á rifinu. Það er dýpkunarskipið Dísa sem vinnur á vöktum við þessa dýpkun en það tekur nokkra daga að dýpka þetta magn.

Dýpkunarskipið Sóley sem getur dýpkað utan hafnar en ekki í hafnarmynninu er ekki að störfum þar sem hennar reynist ekki þörf, sjá má á myndinni sem fylgir fréttinni hvernig dýpið er minnst á milli garðanna.

Veðurútlit fyrir dýpkun er ágætt næstu daga og útlit fyrir að hægt verði að dýpka og jafnvel klára það sem þarf að dýpka svo Herjólfur megi sigla í Landeyjahöfn á þessum næstu dögum. Veðuraðstæður munu svo einnig segja til um mögulegar siglingar í Landeyjahöfn.