Lokið var við að leggja nýju vatnslögnina NSL-4 yfir innsiglinguna til Vestmannaeyja í nótt og endi hennar tekinn á land. Óskar Pétur Friðriksson, ljósmyndari Eyjafrétta, fylgdist með lokakafla framkvæmdarinnar og tók meðfylgjandi myndir.

Blíðskaparveður var í Eyjum og góðar aðstæður þegar útlagningarskipið Seven Navica lauk við að leggja síðustu metra lagnarinnar. Að verkinu loknu hélt Seven Navica frá Vestmannaeyjum eftir að endi lagnarinnar hafði verið tekinn á land.

Eins og áður hefur komið fram var ákveðið að ljúka útlagningunni þrátt fyrir að Vestmannaeyjabær telji að um altjón á lögninni sé að ræða eftir atvik sem varð aðfaranótt sunnudagsins 9. ágúst. Lögnin er þó órofin og er vonast til að hægt verði að nýta hana að einhverju marki. Enn er óvíst hvort hún verði nýtanleg og gæti þurft að leggja aðra almannavarnarlögn í hennar stað.

Halldór B. Halldórsson fylgdist einnig með framkvæmdunum dagana 13. og 14. ágúst og má sjá myndband hans hér að neðan.