Portúgölsku handknattleikskonurnar tvær, Vera Lopes og Telma Amado, hafa skrifað undir nýjan samning hjá ÍBV. Samningurinn er til eins árs og munu þær því leika áfram með liðinu næsta vetur. Vera hefur farið mikinn í vetur, bæði í vörn og sókn en Vera er markahæst í Olísdeild kvenna, búin að skora 174 mörk í 21 leik eða rúmlega 8 mörk að meðaltali. Telma byrjaði rólega en hefur verið að sækja í sig veðrið í síðustu leikjum en alls hefur hún skorað 59 mörk í 21 leik, þar af 10 mörk í síðustu tveimur leikjum ÍBV.

ÍBV hefur þegar tryggt sér heimaleikjaréttinn í fyrstu umferð úrslitanna og gæti með sigri í síðasta leiknum á laugardaginn, tryggt sér þriðja sæti deildarinnar. ÍBV tekur á móti FH á laugardaginn í Eyjum klukkan 13:30.