Á morgun föstudag verður tilkynnt hver verður valinn Íþróttamaður ársins 2007 á Grand Hótel Reykjavík. Knattspyrnukonan Margrét Lára Viðarsdóttir er í hópi 10 efstu í ár í vali íþróttafréttamanna en Margrét var einnig á topp 10 listanum á síðasta ári. Margrét Lára á að baki gott ár fyrir Val og Íslenska landsliðið og nýverið var hún valin knattspyrnukona ársins.

Margrét skoraði í sumar 38 mörk fyrir Íslandsmeistara Vals og bætti þar með sitt eigið markamet. Margrét Lára lék í öllum 9 landsleikjum Íslands á árinu og skoraði þar 8 mörk en Margrét hefur skorað 29 mörk í 35 landsleikjum fyrir A-landslið kvenna.

Talið er að Margrét Lára eigi mikla möguleika á titlum Íþróttamaður ársins 2007 enda árangur hennar stórkostlegur á árinu sem er að líða.

Nöfn þeirra sem tilnefndir eru í ár sem Íþróttamenn ársins 2007 eru í stafrófsröð: Birgir Leifur Hafþórsson, kylfingur úr GKG, Eiður Smári Guðjohnsen, knattspyrnumaður hjá Barcelona, Guðjón Valur Sigurðsson, handknattleiksmaður í Gummersbach, Jón Arnór Stefánsson, körfuknattleiksmaður hjá Lottomatica Roma, Margrét Lára Viðarsdóttir, knattspyrnukona úr Val, Ólafur Stefánsson, handknattleiksmaður hjá Ciudad Real, Ragna Ingólfsdóttir, badmintonkona úr TBR, Ragnheiður Ragnarsdóttir, sundkona úr KR, Snorri Steinn Guðjónsson, handknattleikmaður hjá GOG og Örn Arnarson, sundmaður úr SH.