Verkfall undirmanna á Herjólfi er farið að taka sinn toll á samfélaginu í Vestmannaeyjum og stefnir í enn frekari vandræði með samgöngur á sjó en ef fram heldur sem horfir, mun Herjólfur ekki sigla föstudaga, laugardaga og sunnudaga frá og með næsta föstudegi. Ekkert virðist þokast í sáttaátt og enginn sáttafundur boðaður. Nú hefur verið hafin undirskriftasöfnun á netinu þar sem þess er krafist að samgöngum verði komið í lag. Undirskriftasöfnunin hófst fyrir rétt rúmri klukkustund og strax hafa 130 manns skrifað undir og fer hratt fjölgandi.