Eyjamenn eru komnir í átta liða úrslit Borgunarbikarsins eftir glæsilegan 3:0 sigur á Val í kvöld. Leikurinn var ágætis skemmtun þar sem bæði lið fengu sín færi en að lokum voru það Eyjamenn sem nýttu sín og uppskáru verðskuldaðan sigur. Framherjinn Jonathan Glenn, sem var talsvert gagnrýndur í upphafi móts, hefur fundið markaskóna því hann skoraði tvö mörk í kvöld og átti stóran þátt í því þriðja þegar skot hans var varið en boltinn fór af markverðinum, í varnarmann Vals og í netið. Markið verður líklega skráð sem sjálfsmark enda var boltinn á leið frá marki Valsmanna þegar hann fór í varnarmanninn og inn.

Allt annað yfirbragð var á Eyjaliðinu í kvöld en oft áður. Leikmenn virtust vera tilbúnir að berjast um hvern einasta bolta og þeir Atli Fannar Jónsson og Glenn virtust ná ágætlega saman í sókninni. Báðir áttu þeir mjög góðan leik fyrir ÍBV eins margir aðrir í liði ÍBV. Nú þarf bara að byggja á þessu enda stutt í næsta leik því ÍBV tekur á móti KR á sunnudaginn á Hásteinsvelli í 9. umferð Pepsídeildarinnar.