Heilbrigðisþjónusta og samgöngumál hafa verið mér lengi hugleikin enda hluti af grunnstoðum samfélaga og mikilvægir innviðir sem allir íbúar samfélaga nýta sér á einn eða annan hátt.

Sú þjónusta sem veitt er í hverju samfélagi byggir fyrst og fremst á mannauðnum sem þar býr og af heimsóknum mínum á HSU í Vestmannaeyjum veit ég að þar er fjölbreyttur og stór hópur af hæfu og öflugu heilbrigðisstarfsfólki sem vill þjónusta samfélagið sitt vel til framtíðar.

Heilbrigðisstofnanir ekki síst á landsbyggðinni hafa hins vegar glímt við erfiðan mönnunarvanda, bæði gagnvart læknum og hjúkrunarfræðingum sem því miður hefur ekki tekist nægilega vel að leysa en ljóst að verður að vera meðal forgangsverkefna nýrrar ríkisstjórnar. Við verðum með fjölbreyttum leiðum að mæta þeim vanda sem allra fyrst. Við heyrum ákallið og viljum svara því.

Til að mæta þeim vanda vill Sjálfstæðisflokkurinn m.a.

• innleiða fjárhagslega hvata fyrir heilbrigðisstarfsfólk sem starfar á landsbyggðinni til að ýta undir fjölgun lækna og annarra heilbrigðisstétta þar sem þörfin er brýnust
• Skattaívilnanir fyrir heilbrigðisstarfsfólk sem flyst heim erlendis frá
• Mikilvægt er að fjölga heilbrigðismenntuðum til að mæta þörf á heilbrigðisþjónustu til framtíðar.
• Komið verði á verkefni sjúkraþyrlu mannaðri sérhæfðu heilbrigðisstarfsfólki til að draga úr viðbragðstíma en ekki síður til að auka faglegan stuðning bráðaviðbragðs á landsbyggðinni og bæta þannig starfsumhverfi heilbrigðisstarfsfólks í dreifðari byggðum
• Tryggja aukið aðgengi að geðheilbrigðisþjónustu með einfaldara niðurgreiðslukerfi og tækninýjungum
• Mikilvægt er að hagur allra launþega geti batnað í landinu, bæði á almenna og opinbera markaðnum en til þess þarf kröftugt atvinnulíf og verðmætasköpun.

Auk þessa skipta tryggar samgöngur á sjó og lofti miklu máli. Heimamenn hafa staðið sig vel í rekstri Herjólfs og aukið tíðni ferða og bætt þannig þjónustu við samfélagið. Mikilvægt er að tryggt var reglulegt flug milli lands og Eyja yfir vetrartímann en betur má ef duga skal og augljóst að auka þarf ennfrekar þá þjónustu til framtíðar. Síðast en ekki síst er mikilvægt að tryggja fjármagn til áframhaldandi rannsókna á fýsileika jarðgangnagerðar til Vestmannaeyja.

Ég mun leggja mig allan fram við framgang þessara mála sem þingmaður Sjálfstæðisflokksins í suðurkjördæmi.

Vilhjálmur Árnason

2. sæti Sjálfstæðisflokksins í Suðurkjördæmi