Bæjarráð Vestmannaeyja hefur samþykkt að taka þátt í stofnun farsældarráðs á Suðurlandi og var bæjarstjóra falið að undirrita samstarfsyfirlýsingu fyrir hönd sveitarfélagsins.

Að undanförnu hefur verið unnið að undirbúningi stofnunar farsældarráðs á Suðurlandi í samræmi við lög um samþættingu þjónustu í þágu farsældar barna. Stefnt er að því að samstarfsaðilar skrifi undir samstarfsyfirlýsingu á ársþingi Samtaka sunnlenskra sveitarfélaga (SASS) á Kirkjubæjarklaustri þann 23. október næstkomandi.

Farsældarráð Suðurlands verður svæðisbundinn samráðsvettvangur þjónustuaðila sem bera ábyrgð á þjónustu við börn og fjölskyldur í landshlutanum. Markmið samstarfsins er að efla og samræma þjónustu með samþættri, snemmtækri og heildstæðri nálgun þar sem farsæld barna er leiðarljós í allri stefnumótun og framkvæmd þjónustu.

Á meðal þátttakenda í samstarfinu eru öll sveitarfélög á Suðurlandi, þar á meðal Vestmannaeyjabær, auk ríkisstofnana, framhaldsskóla, lögreglu, heilbrigðisþjónustu og svæðisráða í íþrótta- og æskulýðsmálum.

Farsældarráðið mun meðal annars vinna að samhæfðri þjónustu við börn og fjölskyldur, stuðla að auknum tækifærum barna til náms og samfélagsþátttöku, efla þverfaglegt samstarf þjónustuveitenda og þróa fjögurra ára aðgerðaáætlun byggða á þörfum og styrkleikum svæðisins.

Með ráðinu starfar verkefnastjóri í umboði Sambands sunnlenskra sveitarfélaga sem heldur utan um daglega framkvæmd og tengingu við Barna- og fjölskyldustofu. Samkvæmt yfirlýsingunni mun ráðið funda að lágmarki tvisvar á ári og skila skýrslu um starfsemi sína og framvindu aðgerðaáætlunar á tveggja ára fresti.

Samstarfsyfirlýsingin gildir út kjörtímabil núverandi sveitarstjórna, eða til maí 2026, og verður endurskoðuð í upphafi næsta kjörtímabils.