Ólíklegt er að hægt verði að ráðast í dýpkun í Landeyjahöfn á næstu dögum vegna óhagstæðrar veðurspár og mikilla lægða sem ganga nú yfir landið.

Þetta segir Sólveig Gísladóttir, starfsmaður Vegagerðarinnar. Hún bendir á að skilyrði fyrir dýpkun séu að ölduhæð megi ekki fara yfir 1,5 metra og þurfa slík skilyrði að haldast í nokkra daga samfellt. Samkvæmt ölduspá næstu tíu daga er útlitið dökkt. Ekki er gert ráð fyrir að veður gefi færi á dýpkun á næstunni.

Þarf 2–3 góða daga

Vegagerðin mun þó fylgjast grannt með þróun mála. Ef veður glæðist verður dýpkunarskipið klárt í verkefnið, en viðgerð á því lauk þann 11. mars. Gert er ráð fyrir að tvo til þrjá góða daga þurfi til að dýpka höfnina nægilega svo hægt verði að hefja siglingar þangað á nýjan leik.

Áfram verður fylgst með ölduspá dag frá degi, en hana má nálgast á vefnum sjolag.is.