Árleg páskaeggjaleit Sjálfstæðisflokksins í Vestmanneyjum fer fram nk. laugardag 4. apríl. Eins og venjulega fer leitin fram á Skansinum og hefst stundvíslega kl. 15:00.

Leitinni verður startað formlega á staðnum kl. 15 en allir eiga að bíða við virkið á Skansinum þar til leitinni verður startað af Eyþóri Harðarsyni, oddvita framboðslista Sjálfstæðisflokksins fyrir bæjarstjórnarkosningarnar 16. maí nk. og ekki þýðir að hefja leit fyrr en merki hefur verið gefið.

Meira en 300 páskaegg af ýmsum stærðum og gerðum verða í boði fyrir leitarfólk og því vel þess virði að mæta og taka þátt, en fjöldamörk verða sett á hvað hver og einn má finna af eggjum því við viljum að sem flestir fái eitthvað í sinn hlut.

Páskaeggjaleitin að þessu sinni markar upphaf viðburða sem Sjálfstæðisflokkurinn og frambjóðendur hans efna til í tengslum við kosningabaráttuna fyrir komandi kosningar og munu því frambjóðendur flokksins að mestu sjá um framkvæmd páskaeggjaleitarinnar að þessu sinni.

Páskaeggjaleitin er fyrst og fremst til gamans gerð og er hún frábært tækifæri fyrir fjölskyldur í Eyjum til að hafa saman skemmtilega stund úti í góða veðrinu, sem útlit er fyrir að verði á laugardaginn og ekki skemmir stemmninguna að geta nælt sér í páskaegg í leiðinni.

Við hvetum Eyjabúa alla til að fjölmenna á Skansinn kl. 15: 00 á laugardaginn og taka þátt í þessum skemmtilega viðburði með okkur.

Frambjóðendur Sjálfstæðisflokksins

Fréttatilkynning.