Kvennalið ÍBV í fótbolta tapaði 3-0 gegn FH, í fimmtu umferð Bestu deildar kvenna, í Kaplakrika í dag. Var þetta fyrsti tapleikur Eyjakvenna í sumar en þær hafa farið frábærlega af stað í deildinni.

Eyjakonur byrjuðu leikinn nokkuð vel og voru nokkrum sinnum nálægt því að koma sér í dauðafæri með góðri pressu á síðasta þriðjungi. Það voru hins vegar FH konur sem náðu forystunni á 11. mínútu leiksins þegar Birna Kristín Björnsdóttir skoraði af stuttu færi. 

Eyjakonur urðu fyrir miklu áfalli í fyrri hálfleik. Fyrst þegar markadrottningin Allison Grace Lowrey fór meidd af velli eftir 25 mínútna leik og tíu mínútum síðar fór Embla Harðardóttir sárþjáð af velli og var borin útaf. Eyjakonur hafa verið afar óheppnar með meiðsli í byrjun sumars.

Ekki voru mikið um færi það sem eftir lifði hálfleiks og því staðan 1-0 í hálfleik.

FH konur voru sterkara liðið í síðari hálfleik og komust í 2-0 á 70. mínútu þegar Ída Marín Hermannsdóttir skoraði af vítapunktinum. Helena Maree Errington skoraði svo þriðja mark FH sjö mínútum fyrir leikslok þegar hún potaði boltanum í markið fram hjá Guðnýju Geirsdóttur, markverði ÍBV. Lokatölur leiksins 3-0.

ÍBV er, eftir fimm leiki, í öðru sæti deildarinnar með tólf stig á meðan FH er komið með tíu stig, í þriðja sæti. 

ÍBV stelpurnar taka næst á móti Grindavík/Njarðvík á Hásteinsvelli, mánudaginn 25. maí kl. 16:00.