Héraðsdómur Suðurlands kvað í dag upp dóm í skaðabótamáli sem Vestmannaeyjabær og Ljósleiðarinn höfðuðu vegna skemmda á neysluvatnslögninni NSL-3 og ljósleiðara í Vestmannaeyjahöfn eftir að akkeri fiskiskipsins Hugins VE 55 festist í lögnunum í nóvember 2023. Dómurinn sýknaði Vinnslustöðina hf., Huginn ehf. og VÍS tryggingar hf. af kröfum stefnenda.

Jafnframt var viðurkennt að Huginn ehf. og VÍS tryggingum hf. væri heimilt að takmarka ábyrgð sína samkvæmt ákvæðum siglingalaga. Þá féllst dómurinn ekki á að Vinnslustöðin hf. teldist útgerðarmaður skipsins. Málskostnaður var felldur niður.

Málið á rætur að rekja til 17. nóvember 2023 þegar stjórnborðsakkeri Hugins VE 55 rann út án þess að áhöfnin yrði þess vör á leið skipsins til hafnar. Akkerið dróst eftir hafsbotninum, festist í neysluvatnslögninni NSL-3 og ljósleiðara milli lands og Vestmannaeyja og olli umfangsmiklum skemmdum á báðum lögnum.

Vestmannaeyjabær höfðaði málið vegna tjóns á vatnslögninni en Ljósleiðarinn vegna skemmda á ljósleiðaranum. Í málinu var meðal annars deilt um bótaábyrgð stefndu, hvort Vinnslustöðin bæri ábyrgð sem útgerðarmaður skipsins og hvort Huginn ehf. og VÍS tryggingar hf. gætu takmarkað ábyrgð sína samkvæmt siglingalögum.

Í yfirlýsingu frá útgerð Hugins VE 55 kemur fram að félagið telji dóminn mikilvægt skref í úrlausn málsins. Jafnframt sé um að ræða flókið og fordæmisgefandi mál og að líklegt sé að því verði áfrýjað. Af þeim sökum tjái útgerðin sig ekki efnislega um niðurstöðu dómsins að svo stöddu.

Eyjafréttir munu fjalla nánar um málið á næstu dögum.

Fréttin var uppfærð kl. 14.30.