Kvennalið ÍBV hefur leik í efri hluta Bestu deildarinnar í dag þegar Þróttur úr Reykjavík kemur í heimsókn á Hásteinsvöll. Flautað verður til leiks klukkan 17:15.

ÍBV lauk hefðbundinni deildarkeppni í þriðja sæti með 27 stig eftir 18 leiki. Þróttur hafnaði í fimmta sæti með 23 stig og skilja því fjögur stig liðin að þegar úrslitahluti tímabilsins hefst.

Liðin mættust síðast á Hásteinsvelli 21. ágúst og þá vann Þróttur 2:1. Gestirnir komust í tveggja marka forystu í fyrri hálfleik áður en Milena Mihaela Patru minnkaði muninn fyrir ÍBV undir lok leiksins.

Fram undan er því krefjandi verkefni fyrir Eyjakonur, sem freista þess að hefja keppni í efri hlutanum með sigri á heimavelli. Leikurinn hefst eins og áður segir klukkan 17:15 á Hásteinsvelli.