ÍBV tók á móti nýkrýndum bikarmeisturum í Þrótti Reykjavík á Hásteinsvelli í 1. umferð efri hluta Bestu deildar kvenna í kvöld, þar sem heimakonur höfðu betur, 4 – 3. 

Fyrri hálfleikurinn byrjaði fremur rólega. Þróttur braut ísinn á 19. mínútu þegar Sigríður Theódóra Guðmundsdóttir fékk boltann hægra megin á vellinum og sendi boltann fyrir markið. Þar var Katie Cousins mætt og stýrði boltanum í netið og kom Þrótti í 0 – 1.

Eyjakonur svöruðu með þremur mörkum. Ágústa María Valtýsdóttir jafnaði fyrir ÍBV eftir hálftíma leik. Hún vann þá boltann af varnarmanni Þróttar, lék fram hjá Ninnu Björk Þorsteinsdóttur í markinu og setti boltann í autt markið.

Olga Sevcova kom ÍBV yfir á 40. mínútu eftir frábæran undirbúning Fridrikku Marie Clementsen. Fridrikka skoraði síðan sjálf þriðja mark ÍBV rétt fyrir hálfleiksflautið, eftir undirbúning Olgu. Staðan því 3 – 1 í hálfleik.

Í síðari hálfleik minnkaði Þróttur muninn í 3 – 2 á 57. mínútu með marki frá Bríeti Fjólu Bjarnadóttur. Bríet Fjóla var svo nálægt því að jafna leikinn þrettán mínútum fyrir leikslok en skot hennar hafnaði í stönginni.

Það var svo markadrottningin Allison Grace Lowrey sem skoraði fjórða mark ÍBV á 80. mínútu eftir undirbúning Jessicu Jean Hinton. Björgey Njála Andreudóttir klóraði í bakkann fyrir Þrótt á lokamínútu leiksins þegar hún skoraði af stuttu færi. Niðurstaðan varð því 4 – 3 sigur ÍBV.

ÍBV er í þriðja sæti efri hluta deildarinnar með 30 stig, tíu stigum á eftir Breiðabliki og FH. Þróttur er í fimmta sæti með 23 stig.

Úrslit kvöldsins í Bestu deild kvenna:

• FH 1 – 0 Stjarnan
• ÍBV 4 – 3 Þróttur R.
• Fram 2 – 2 Víkingur R.