Bæjarstjórn Vestmannaeyja gagnrýnir í sameiginlegri bókun að þingmenn Suðurkjördæmis hafi ekki komið til Eyja í kjördæmaviku. Hún segir óásættanlegt að heimsóknir þingmanna ráðist af því um hvaða höfn Herjólfur sigli.

Allir níu bæjarfulltrúar Vestmannaeyja standa að bókuninni, sem lögð var fram á fundi bæjarstjórnar þriðjudaginn 13. október. Tilefnið var yfirferð Írisar Róbertsdóttur bæjarstjóra á helstu verkefnum og málum frá síðasta fundi.

Þar var meðal annars fjallað um samgöngumál, fjárhagsáætlunarvinnu, almannavarnalögnina NSL-4 og kjördæmaviku. Í yfirferð bæjarstjóra kom einnig fram að Herjólfur III væri loks kominn með haffærisskírteini.

Hvetja þingmenn til að haga ferðum eins og Eyjamenn

Í bókuninni gagnrýnir bæjarstjórn að þingmenn kjördæmisins hafi ekki komið til Vestmannaeyja í kjördæmaviku.

„Það er óásættanlegt að heimsóknir þingmanna ráðist af því hvort Herjólfur sigli um Landeyjahöfn eða Þorlákshöfn,“ segir í bókuninni.

Bæjarstjórn leggur áherslu á að Vestmannaeyjar séu hluti af Suðurkjördæmi alla daga ársins og beinir skýrri hvatningu til þingmanna um skipulag heimsókna.

„Bæjarstjórn hvetur þingmenn til að skipuleggja kjördæmaviku með sama hætti og Eyjamenn þurfa daglega að haga sínum ferðum.“

Ekki er í bókuninni gerður greinarmunur á einstökum þingmönnum eða þingflokkum.