Vestmannaeyjaskipin Bergey VE og Vestmannaey VE komu til löndunar í Neskaupstað snemma í morgun eftir stutta veiðiferð í leiðindabrælu. Bergey var með rúm 50 tonn og Vestmannaey með svipaðan afla, að því er fram kemur á vef Síldarvinnslunnar.

Skipin lönduðu síðast sunnudag og var því ekki um langan túr að ræða. Aflinn var að langmestu leyti þorskur. Jón Valgeirsson, skipstjóri á Bergey, sagði í samtali við vef Síldarvinnslunnar að veðrið hefði sett svip sinn á ferðina.

„Það var bræludrulla allan tímann. Við byrjuðum á að keyra norður á Gletting og tókum þar eitt hol. Síðan var haldið á Litlagrunn og Vopnafjarðargrunn og þar var þokkalegt kropp. Við enduðum síðan á Glettinganesgrunni. Aflinn var langmest þorskur. Við komum inn í morgunroðanum og það verður haldið til veiða á ný í kvöld,“ sagði Jón.

Birgir Þór Sverrisson, skipstjóri á Vestmannaey, sagði skipin hafa verið á svipuðum slóðum. Hundleiðinleg bræla hefði einkennt túrinn og aflinn verið nánast alfarið þorskur.