Íbúum í Vestmannaeyjum fjölgaði um 25 á tímabilinu frá 1. desember 2019 til 1. júlí sl. Þetta gerir 0,57% aukningu og er íbúafjöldi nú orðinn 4383. Fjölgun á landinu öllu nam 0,89%. Mest hlutfallsleg fjölgun var á Suðurlandi um 1,4% eða 433 íbúa.

Íbúum Reykjavíkurborgar fjölgaði um 1.503 á tímabilinu frá 1. desember 2019 til 1. júlí sl. Það sveitarfélag sem kemur næst var Garðabær en þar fjölgaði íbúum um 473 á sama tímabili.

Hlutfallslega mest fjölgun í Fljótsdalshreppi
Þegar horft er til alls landsins þá hefur íbúum Fljótsdalshrepps fjölgað hlutfallslega mest síðastliðna sex mánuði eða um 11,6% en íbúum þar fjölgaði þó aðeins um 10 íbúa eða úr 86 í 96 íbúa. Íbúum fækkaði hlutfallslega mest í Reykhólahreppi eða um 7,6%. Þá fækkaði íbúum í 21 sveitarfélagi af 72 á ofangreindu tímabili.

Fækkun í tveimur landshlutum
Lítilsháttar fækkun varð í tveimur landshlutum, Vestfjörðum og á Norðurlandi eystra. Fækkunin á Vestfjörðum nam 0,8% en á Norðurlandi eystra um 0,1%.