Handknattleiksdeild ÍBV hefur náð samkomulagi við Arnar Pétursson um að Arnar verði þjálfari mfl. karla á næsta keppnistímabili.

Arnar þarf ekki að kynna fyrir stuðningsmönnum ÍBV. Hann lék með ÍBV upp alla yngri flokka og var í liði ÍBV sem vann 2. deild karla 1995. Arnar lék einnig með Stjörnunni, FH og Haukum og varð tvívegis Íslandsmeistari með Haukum áður hann snéri aftur heim árið 2009 og tók við þjálfun ÍBV sem þá lék í 1. deild. Undir stjórn Arnars og Erlings Richardssonar vann ÍBV 1. deildina 2013 og ásamt Gunnari Magnússyni gerði Arnar ÍBV að Íslandsmeisturum 2014. Á núliðnu keppnistímabili tók Arnar sér hlé frá þjálfun en snýr nú aftur af fullum krafti.

Handknattleiksdeild ÍBV lýsir yfir mikilli ánægju með ráðningu þessa og er hún liður í því verðuga verkefni að festa ÍBV enn frekar í sessi sem eitt af betri liðum á Íslandi.

F.h. hönd handknattleiksdeildar ÍBV

Karl Haraldsson, formaður.